| lyrics or other text: | Une jeune fillette
De noble coeur,
Plaisante et joliette,
De grand' valeur.
Outre son gré, on l'a rendu' nonnette
Cela point ne luy haicte
Dont vit en grand' douleur.
Un soir après complie
Seulette estoit,
En grand mélancolie
Se tourmentoit,
Disant ainsi, douce Vierge Marie
Abregez moy la vie,
Puis que mourir je doy.
Mon pauvre coeur souspire
Incessamment,
Aussi ma mort desire
Journellement.
Qu'a mes parens ne puis mander n'escrire,
Ma beauté fort empire,
Je vis en grand tourment.
Que ne m'a-t-on donnée
À mon loyal amy,
Qui tant m'a désirée
Aussi ay-je moy luy,
Toute la nuict my tiendroit embrassée
Me disant sa pensée
Et moy la mienne a luy.
À Dieu vous dy mon père,
Ma mère e mes parens,
Qui m'avez voulu faire
Nonette en ce couvent,
Ou il n'y a point de resjouissance,
Je vis en desplaisance
Je n'attens que la mort.
La mort est fort cruelle
A endurer,
Combien qu'il faut par elle
Trestous passer.
Encor'est plus grand mal que j'endure,
Et la peine plus dure
Qu'il me faut supporter.
A Dieu vous dy les filles
De mon pays,
Puis qu'en c'est Abbaye
Me faut mourir,
En attendant de mon Dieu la sentence
Je vy en espérance
D'en avoir réconfort.
|
